Ministri i Brendshëm, Besfort Lamallari, ka reaguar pas operacionit të zhvilluar nga Agjencia e Mbikëqyrjes Policore (AMP) dhe Policia e Shtetit në Sarandë, ku u arrestuan disa drejtues dhe punonjës policie të dyshuar për përfshirje në veprimtari të paligjshme.

Përmes një deklarate publike, Lamallari theksoi se në radhët e Policisë së Shtetit nuk do të ketë vend për efektivë që abuzojnë me detyrën apo bashkëpunojnë me elementë kriminalë, duke e cilësuar operacionin një shembull të qartë të vendosmërisë institucionale.

“Në Policinë e Shtetit nuk ka dhe nuk do të ketë vend për askënd që bëhet palë me shkelësit e ligjit, që abuzon me detyrën apo bashkëpunon me elementë kriminalë,” u shpreh ministri.

Ai vlerësoi bashkëpunimin mes AMP dhe Policisë së Shtetit në këtë operacion, duke e konsideruar një hap të rëndësishëm në pastrimin e radhëve të strukturave ligjzbatuese nga elementët e papërshtatshëm.

Lamallari theksoi gjithashtu se çdo rast abuzimi, nga ndërtimet pa leje deri te bashkëpunimi me grupet kriminale, do të trajtohet me “zero tolerancë”, ndërsa efektivët që shkelin ligjin do të përballen me drejtësinë.

“Ky proces nuk është i pari dhe nuk do të jetë i fundit. Asnjë hap mbrapa,” deklaroi ministri, duke përgëzuar strukturat e përfshira në operacion.