Britania e Madhe ka njoftuar një paketë të re financimi deri në 23 milionë euro për të mbështetur përpjekjet kundër përhapjes së Ebola-s në lindje të Republikës Demokratike të Kongos.

Sipas Ministrisë së Jashtme britanike, fondet do të shkojnë për Organizatën Botërore të Shëndetësisë (OBSH), agjencitë e Kombeve të Bashkuara dhe organizatat humanitare që veprojnë në terren.

Deri më tani, në Kongo janë raportuar rreth 600 raste të dyshuara dhe 139 vdekje të dyshuara nga Ebola. Nga këto, 51 raste janë konfirmuar përmes analizave laboratorike, ndërsa dy raste janë regjistruar edhe në Ugandën fqinje.

OBSH ka paralajmëruar se ekziston rreziku që virusi të përhapet më tej dhe të shkaktojë një krizë më të gjerë shëndetësore në rajon.

Sipas autoriteteve britanike, financimi do të përdoret për forcimin e kontrollit epidemiologjik, mbrojtjen e punonjësve shëndetësorë dhe përmirësimin e masave parandaluese në zonat e prekura.