Kuvendi ka miratuar me 110 vota pro ndryshimet në rregulloren parlamentare, pas një dakordësie mes Partisë Socialiste dhe Partisë Demokratike, që solli tërheqjen e shumicës nga disa propozime të kundërshtuara nga opozita dhe pranimin e një sërë kërkesash për forcimin e kontrollit parlamentar.

Ndryshimet prekin raportimin e institucioneve në Kuvend, funksionimin e komisioneve, masat disiplinore ndaj deputetëve si dhe zgjatjen e seancave plenare.

Sipas rregullores së re, SPAK nuk do të raportojë më në seancë plenare, por vetëm në komisionet parlamentare. Në seancë do të raportojnë vetëm institucionet që kanë detyrim kushtetues, përfshirë Avokatin e Popullit, Prokurorin e Përgjithshëm, KLGJ, KLP, ILD dhe KLSH.

Marrëveshja mes palëve erdhi pas negociatave, ku socialistët tërhoqën disa propozime të mëhershme, përfshirë procedurën e përshpejtuar për ligjet e integrimit europian, uljen e kohës së diskutimeve nga 10 në 5 minuta dhe kufizimin e raportimeve vetëm në komisione.

Në kuadër të dakordësisë, u vendos që ligjet e integrimit të kalojnë me procedurë normale, përveç rasteve kur qeveria kërkon përshpejtim të argumentuar. Po ashtu, komisionet parlamentare do të jenë të detyruara të zhvillojnë mbledhje ose seanca dëgjimore me kërkesë të opozitës brenda dy ditëve, ndërsa Kryetari i Kuvendit do të ndërhyjë në rast mosdhënieje informacioni nga institucionet.

Me kërkesë të PD-së, u pranua gjithashtu ndërprerja e seancave plenare në orën 22:00 dhe vijimi i tyre ditën pasardhëse, si dhe pezullimi automatik i masave disiplinore ndaj deputetëve në rast ankimi.

Ndryshimet parashikojnë edhe barazi në përbërjen e Sekretariatit të Etikës mes shumicës dhe opozitës, ku vota e sekretarit do të jetë përcaktuese në rast barazimi, si dhe barazi në numrin e këshilltarëve politikë për dy grupet më të mëdha parlamentare.

Kreu i grupit parlamentar socialist, Taulant Balla, e cilësoi marrëveshjen si “fitore të parlamentarizmit”, duke theksuar se shumica mbetet e hapur për dialog me opozitën.

Ndryshimet janë përshëndetur edhe nga Prezenca e OSBE-së në Shqipëri, e cila i ka cilësuar si një hap pozitiv për dialogun politik dhe funksionimin e demokracisë parlamentare.