Me afrimin e Kupës së Botës 2026, FIFA ka nisur të diskutojë mundësitë për ndryshime të mëtejshme në formatin e turneut pas përfundimit të tij.

Sipas medias spanjolle “AS”, organi drejtues i futbollit botëror dhe drejtuesit e tij po shqyrtojnë ide që lidhen me zgjerimin e mëtejshëm të pjesëmarrjes, me synimin për t’u dhënë më shumë vendeve mundësi kualifikimi në turne.

Kjo lëvizje shihet si pjesë e një vizioni për të zgjeruar përfaqësimin global në futboll dhe për t’u dhënë shanse edhe shteteve që historikisht kanë pasur vështirësi në kualifikim.

Aktualisht, Kupa e Botës 2026 është planifikuar të zhvillohet me 48 ekipe, një format që pritet të përdoret edhe në edicionin e vitit 2030. Megjithatë, sipas raportimeve, FIFA nuk përjashton mundësinë e rritjes së mëtejshme të numrit të pjesëmarrësve në të ardhmen, një ide e mbështetur edhe nga CONMEBOL.

Megjithatë, media spanjolle thekson se kjo mbetet ende në fazë diskutimesh dhe “ideja ka shumë rrugë për të bërë përpara se të bëhet realitet”.