Mijëra qytetarë u mblodhën në qendër të Madridit për të protestuar ndaj rritjes së vazhdueshme të çmimeve të banesave dhe qirave, një problem që po prek gjithnjë e më shumë familjet spanjolle.

Demonstruesit marshuan në rrugët kryesore të kryeqytetit me pankarta dhe thirrje në mbrojtje të së drejtës për strehim. Mes mesazheve më të forta ishte slogani: “Duam fqinjë, jo turistë”, duke shprehur pakënaqësinë ndaj ndikimit të turizmit masiv në tregun e banesave.

Çështja e strehimit konsiderohet një nga sfidat më të mëdha politike për qeverinë e kryeministrit Pedro Sánchez, ndërsa vendi po afrohet drejt zgjedhjeve të vitit 2027.

Ekspertët vlerësojnë se rritja e kërkesës për apartamente, fluksi turistik dhe shtimi i popullsisë si pasojë e emigracionit kanë sjellë rritje të ndjeshme të qirave, sidomos në qytete të mëdha si Madridi dhe Barcelona.

Protesta vjen në një moment tensionesh politike në Spanjë, vetëm një ditë pas tubimeve të tjera kundër qeverisë Sánchez, mes kritikave për korrupsion dhe mënyrën e drejtimit të vendit.

Ndërkohë, qeveria spanjolle ka miratuar një plan prej 7 miliardë eurosh për ndërtimin e banesave publike dhe mbështetjen e të rinjve për përballimin e kostove të strehimit.