Erjon Alibej, i penduar i drejtësisë, ka dhënë dëshmi të detajuara lidhur me vrasjen e vëllezërve Haxhia, duke përshkruar momentet e ngjarjes dhe rolin e personave të përfshirë.

“Po dal direkt tek dita e vrasjes së vëllezërve Haxhia që ka ndodhur… isha në tension dhe në diskutim edhe vetë, por edhe me Nuredinin për vrasjet e Altin Ndocit dhe Besmir Haxhisë”, ka deklaruar Alibej.

Ai ka treguar se sipas tij viktimat u nxorën në pritë dhe u ndoqën me automjet. “I kanë shkuar paralel me makinë dhe duke i gjuajtur gjatë gjithë kohës… pa e ditur që ishte edhe Viktor Haxhia”, tha ai, duke shtuar se gjatë operacionit ka qenë në komunikim të vazhdueshëm me persona të përfshirë.

Në dosjen e SPAK, prokurorja Doloreza Musabelliu ka shpjeguar se Alibej ka kërkuar vetë të bashkëpunojë me organet e drejtësisë.

“Ka kërkuar të japë dëshmi me iniciativë… pas verifikimeve dhe kryqëzimeve vendosëm t’i japim statusin e bashkëpunëtorit”, ka deklaruar Musabelliu.

Ndërkohë, gjyqtari i Apelit të Posaçëm, Florjan Kalaja, ka ngritur debate mbi kuadrin ligjor të bashkëpunëtorëve të drejtësisë, duke theksuar se numri i veprave të përfshira në këtë mekanizëm është shumë i lartë.

“Kam arritur të bëj një inventar… janë 262 vepra të procedueshme me bashkëpunëtorë”, ka thënë Kalaja, duke shtuar se nevojiten ndryshime ligjore për harmonizimin e sistemit.

Prokurorja Musabelliu ka theksuar gjithashtu se statusi i bashkëpunëtorit jepet vetëm pas verifikimit të plotë të deklarimeve, besueshmërisë dhe fakteve të reja që dalin nga dëshmitë.

Proceset e lidhura me bashkëpunëtorët e drejtësisë vijojnë të mbeten në qendër të vëmendjes në disa dosje të krimit të organizuar, ku deklarimet e të penduarve po konsiderohen vendimtare për hetimet.