Presidenti i Ukrainës, Volodymyr Zelensky, ka deklaruar se Rusia po humbet gradualisht iniciativën ushtarake në front, duke krijuar sipas tij një mundësi reale për arritjen e një zgjidhjeje diplomatike të luftës.

Në një intervistë për CBS News, Zelensky u shpreh se kjo tendencë ka nisur që në fund të vitit 2025 dhe se ai ua ka përcjellë këtë vlerësim edhe partnerëve ndërkombëtarë, përfshirë Shtetet e Bashkuara.

“U thashë atyre në janar se mendoj që kemi një dritare për negociata, sepse çdo muaj ata do të humbasin gjithnjë e më shumë njerëz dhe, për këto arsye, do të humbasin iniciativën në fushën e betejës”, deklaroi Zelensky.

Sipas presidentit ukrainas, që nga dhjetori i vitit 2025, forcat ruse nuk kanë arritur të ruajnë të njëjtin ritëm avancimi, ndërsa gjatë muajit të fundit, sipas tij, trupat ukrainase kanë çliruar po aq territor sa ka tentuar të pushtojë armiku.

Zelensky theksoi se muajt para ardhjes së dimrit mund të jenë vendimtarë për zhvillimet e ardhshme të konfliktit.

“Tani kemi këtë periudhë kohore para dimrit. Mendoj se para dimrit duhet të gjejmë një mënyrë diplomatike për t’u ulur dhe për të biseduar”, u shpreh ai.

Deklaratat e liderit ukrainas vijnë në një kohë kur përpjekjet ndërkombëtare për të nxitur dialogun mes Kievit dhe Moskës janë shtuar, ndërsa lufta e nisur nga Rusia kundër Ukraina vazhdon të mbetet një nga konfliktet më të mëdha gjeopolitike në botë.