Detaje të reja janë zbardhur nga aksidenti fatal në qytetin e Lushnjës, ku humbi jetën 43-vjeçari Ernis Xhumari.

Sipas raportimeve, viktima ka shkuar para Komisariatit të Policisë Lushnjë, ku dyshohet se ka kryer manovra të rrezikshme me automjetin e tij dhe ka përdorur fjalor ofendues. Pas këtyre veprimeve, policia ka ndërhyrë dhe i është vënë në ndjekje.

Në tentativë për t’iu larguar forcave të rendit, 43-vjeçari ka lëvizur me shpejtësi të lartë, duke humbur kontrollin e automjetit. Mjeti është përplasur me bordurat anësore të rrugës në zonën e njohur si “Rrethrrotullimi i Plasmasit”, më pas është përmbysur dhe është përfshirë nga flakët. Pavarësisht ndërhyrjes, drejtuesi nuk ka mundur të mbijetojë.

Policia ka dhënë edhe njoftimin zyrtar mbi ngjarjen:

“Rreth orës 01:45, të datës 02.06.2026, punonjësit e sallës operative të Komisariatit të Policisë Lushnjë, nëpërmjet kamerave të sigurisë, kanë konstatuar përpara Komisariatit, një automjet tip ‘Mercedes-Benz’, duke kryer manovra të çrregullta, dhe më pas drejtuesi i automjetit ka dalë nga automjeti duke bërtitur para Komisariatit, veprim të cilin e ka përsëritur disa herë.

Në këto kushte, salla operative ka njoftuar Patrullën e Përgjithshme që ishte me shërbim në qytet, për t’u afruar në Komisariat, me qëllim verifikimin e drejtuesit të automjetit dhe arsyen e sjelljeve të tij.

Drejtuesi i automjetit, sapo ka parë Patrullën e Përgjithshme që vinte drejt Komisariatit, është larguar me shpejtësi të madhe dhe pas disa minutash dyshohet se për shkak të shpejtësisë së madhe dhe humbjes së kontrollit mbi drejtimin e automjetit, automjeti është përplasur me bordurat anësore të rrugës, në vendin e quajtur ‘Rrethrrotullimi i Plasmasit’ dhe është përmbysur. Si pasojë, drejtuesi i automjetit, shtetasi E. Xh., 43 vjeç, ka humbur jetën. Grupi hetimor, në drejtimin e Prokurorisë, po punon për zbardhjen e plotë të rrethanave dhe shkakut të aksidentit.”