Një ngjarje e rëndë kriminale ka tronditur Long Island në SHBA, ku 22-vjeçari Ronnie Yahir Alvarenga Rivera akuzohet për vrasjen e dy grave brenda pak orësh.

Sipas autoriteteve amerikane, viktima e parë ishte fqinja e tij, 57-vjeçarja Raquel Hernandez Castillo. Prokurorja e Qarkut Nassau, Ann Donnelly, deklaroi se i riu u kishte thënë hetuesve se ishte irrituar nga zhurmat që ajo bënte në apartament.

“Zhurma e takave të larta dhe fakti që fliste me zë të lartë në telefon po më çmendnin”, mësohet të ketë deklaruar ai gjatë hetimeve.

Sipas akuzës, më 30 prill ai e sulmoi gruan me thikë, duke i shkaktuar plagë të shumta fatale. “Kur u arrestua, rrobat e tij ishin të mbuluara me gjak”, tha Donnelly gjatë një deklarate për mediat.

Hetuesit thonë se pas krimit të parë, Rivera kishte arritur në përfundimin se arrestimi i tij ishte i pashmangshëm dhe vendosi të kryente një tjetër sulm. Pak pas mesnatës së 1 majit, ai dyshohet se sulmoi një 42-vjeçare me të cilën kishte pasur mosmarrëveshje të mëparshme dhe nga e cila ndihej “i parespektuar”.

Sipas dosjes hetimore, gruaja nuk mundi t’u mbijetonte plagëve të marra.

Pas krimit të dytë, i dyshuari telefonoi vetë policinë rreth orës 03:00 të mëngjesit.

“Unë vrava dikë sonte”, mësohet t’u ketë thënë ai autoriteteve.

Mediat amerikane raportojnë se Rivera vuante nga probleme të shëndetit mendor, megjithëse detajet mbi gjendjen e tij nuk janë bërë publike nga autoritetet. Ai kishte hyrë në Shtetet e Bashkuara në vitin 2016, kur ishte 12 vjeç.

Të martën, 22-vjeçari doli para gjykatës dhe u deklarua i pafajshëm ndaj akuzave për vrasje të shkallës së parë dhe të dytë, si dhe për vepra të tjera penale që lidhen me dy ngjarjet.

Rasti ka shkaktuar reagime të forta në komunitetin lokal dhe ka rikthyer debatin mbi emigracionin e paligjshëm, sigurinë publike dhe trajtimin e personave me probleme të shëndetit mendor në SHBA.