Një zhvillim i ri është regjistruar në zonën e Portonovës dhe pranë Hidrovorit në Zvërnec, ku nuk ndodhet më asnjë roje sigurie dhe asnjë mjet pune brenda rrethimit të vendosur për projektin.

Sipas vëzhgimeve në terren, porta kryesore e hyrjes qëndron e hapur, ndërsa punonjësit e sigurisë private janë larguar plotësisht nga zona. Po ashtu, nuk janë konstatuar aktivitete pune apo mjete të angazhuara në kantier.

Kjo situatë vjen pas protestave të vazhdueshme të banorëve dhe aktivistëve kundër projektit në Zvërnec, si dhe pas reagimeve të fundit të institucioneve shtetërore lidhur me ngjarjet e ndodhura në zonë.

Aktualisht, terreni paraqitet i qetë dhe pa praninë e forcave të sigurisë, ndërsa mbetet ende e paqartë nëse largimi i rojeve dhe mjeteve është një masë e përkohshme apo pjesë e një vendimi më afatgjatë për ecurinë e projektit.