Një skemë e dyshuar vjedhjeje dhe mashtrimi ndaj klientëve është zbuluar në UBA Bank (Banka e Bashkuar e Shqipërisë), ku sipas hetimeve të Prokurorisë së Tiranës janë përvetësuar 309.740 euro dhe 92.000 dollarë nga llogaritë e dy klientëve.

Për këtë çështje, 12 punonjës të bankës janë vënë nën masa sigurie. Mes tyre janë arrestuar drejtori i bankës, Albin Keta, dhe zëvendësi i tij, Gilbert Hoxha, ndërsa gjashtë punonjës të tjerë janë lënë në “arrest shtëpie” dhe katër janë pezulluar nga detyra.

Hetimet nisën pas denoncimit të një klienti në vitin 2025, i cili konstatoi lëvizje dhe tërheqje të paautorizuara nga llogaritë e tij bankare. Sipas organit të akuzës, hetimet zbuluan një mekanizëm të organizuar, ku punonjës me akses në fondet e klientëve kryenin manipulime në sistemin bankar, të cilat më pas verifikoheshin dhe autorizoheshin nga nivele të ndryshme drejtuese.

Nga verifikimet ka rezultuar se janë kryer 30 tërheqje pa mandat, ndërsa janë hapur dhe mbyllur pa autorizim depozita në euro dhe dollarë. Gjithashtu dyshohet se janë përdorur mandate të falsifikuara, janë kryer konvertime valutore të kundërligjshme dhe janë ndryshuar të dhëna në sistem pa miratimin e klientëve.

Prokuroria ka ngritur ndaj të dyshuarve akuzat për “Vjedhje duke shpërdoruar detyrën”, “Falsifikim dokumentesh” dhe “Falsifikim kompjuterik”.

Ndërkohë, mbetet për t’u sqaruar nëse hetimi do të zgjerohet më tej, pasi përmasat e skemës kanë ngritur pikëpyetje mbi përfshirjen e personave të tjerë dhe nivelin e organizimit të aktivitetit të dyshuar kriminal brenda institucionit bankar.