Cassie Ventura ka deklaruar në dokumente gjyqësore se aktualisht jeton jashtë Shteteve të Bashkuara dhe nuk ka plane të rikthehet për të jetuar në vend.

Sipas një deklarate të depozituar më 1 maj në kuadër të një padie të ngritur ndaj saj nga ish-mbikëqyrësi Clayton Howard, këngëtarja ka konfirmuar se është larguar nga SHBA, pa bërë publik vendin ku jeton aktualisht.

“Unë jetoj jashtë Shteteve të Bashkuara. Nuk kam ndërmend të kthehem për të jetuar në SHBA”, citohet të ketë deklaruar Ventura në dokumentet gjyqësore.

Ende nuk dihet se në cilin shtet është zhvendosur apo kur ka ndodhur saktësisht largimi i saj.

Ky zhvillim vjen rreth një vit pas dëshmisë së saj në gjyqin federal ndaj Sean Combs, i njohur si Diddy, i cili u përball me akuza të rënda për trafikim dhe shfrytëzim seksual.

Gjatë procesit gjyqësor, Ventura dëshmoi se kishte përjetuar abuzime fizike dhe emocionale gjatë marrëdhënies së saj me Combs, e cila zgjati nga viti 2007 deri në vitin 2018.

Më herët, në vitin 2023, ajo kishte ngritur një padi civile ndaj reperit, çështje që u mbyll brenda 24 orëve me marrëveshje mes palëve. Mediat amerikane raportuan më pas se marrëveshja financiare kishte një vlerë prej rreth 20 milionë dollarësh.

Ndërkohë, në çështjen aktuale ligjore, Clayton Howard pretendon se Ventura i ka shkaktuar dëme fizike dhe emocionale, duke kërkuar dëmshpërblim përmes gjykatës.