Përdorimi i aplikacioneve të takimeve po shoqërohet gjithnjë e më shpesh me një model të përsëritur: fillim entuziast, i ndjekur nga lodhje emocionale, frustrim dhe ndjesi vetmie.

Studiuesit e kanë përkufizuar këtë fenomen si “dating app burnout”, një gjendje që, sipas tyre, po shfaqet tek një numër i konsiderueshëm përdoruesish.

Rasti i një përdorueseje 29-vjeçare e ilustron këtë cikël. Pas një periudhe shkëputjeje nga aplikacionet, ajo është rikthyer me shpresën se përvoja do të ishte më pozitive, por është përballur shpejt me mbingarkesë bisedash dhe presion për të qenë vazhdimisht interesante, çka ka sjellë lodhje të vazhdueshme.

Sipas ekspertëve, “burnout”-i në këtë kontekst përfshin tre elemente kryesore: lodhje emocionale, cinizëm ndaj personave në aplikacione dhe ndjesi joefikasiteti, ku përdoruesit besojnë se asgjë nuk po funksionon.

Studime të ndryshme tregojnë se përdoruesit e aplikacioneve të takimeve raportojnë nivele më të larta ankthi, depresioni dhe vetmie krahasuar me ata që nuk i përdorin, me efekte më të theksuara tek personat që kanë vështirësi emocionale.

Studiuesit theksojnë se, ndonëse këto platforma synojnë të lehtësojnë njohjet mes njerëzve, përdorimi i vazhdueshëm mund të krijojë një cikël “hyrje-dalje” që e rrit lodhjen dhe e ul kënaqësinë në procesin e njohjes.

Megjithatë, ekspertët shtojnë se problemi nuk lidhet vetëm me teknologjinë, por edhe me mënyrën si ajo pasqyron dhe amplifikon vështirësitë ekzistuese të marrëdhënieve në jetën moderne.