Një aksident rrugor është regjistruar në aksin Sarandë–Delvinë, pranë fshatit Karahaxh, ku një 16-vjeçar ka mbetur i plagosur pasi automjeti që drejtonte ka dalë nga rruga dhe ka përfunduar në një kanal anësor.

Sipas të dhënave paraprake, i mituri me inicialet D. Cauli po lëvizte me një automjet tip “Golf” kur humbi kontrollin e mjetit. Menjëherë pas aksidentit, banorë të zonës dhe kalimtarë të rastit kanë ndërhyrë për t’i ardhur në ndihmë dhe kanë njoftuar policinë dhe shërbimet e urgjencës.

I riu është transportuar në spitalin e Sarandës, ku ka marrë ndihmën e parë mjekësore. Mjekët kanë konstatuar thyerje në këmbë dhe dëmtime të tjera të lehta, ndërsa për shkak të gjendjes së tij pritet të dërgohet në Spitalin e Traumës në Tiranë për trajtim më të specializuar.

Ndërkohë, dëshmia paraprake e 16-vjeçarit ka ngritur dyshime për përfshirjen e një automjeti tjetër në aksident.

“Dyshoj se makina ime mund të jetë prekur nga një mjet tjetër para se të humbisja kontrollin, por nuk e kujtoj qartë ngjarjen”, mësohet të ketë deklaruar ai për efektivët e policisë.

Policia dhe grupi hetimor kanë nisur verifikimet për të zbardhur rrethanat e plota të aksidentit dhe për të përcaktuar nëse në ngjarje është përfshirë edhe një automjet tjetër.