Një 34-vjeçar nga Tirana rezulton i zhdukur prej tre ditësh, ndërsa familjarët e tij kanë humbur çdo kontakt dhe po kërkojnë ndihmën e qytetarëve për ta gjetur.

Bëhet fjalë për Eglant Koçin, i lindur më 17 shtator 1991, i cili është parë për herë të fundit në zonën e Sheshit Wilson në Tiranë.

Sipas familjarëve, ai ka lëvizur me një motor me targë CT969 dhe që nga ai moment nuk ka pasur më asnjë informacion për vendndodhjen e tij.

Rasti është denoncuar pranë autoriteteve, ndërsa policia po kryen verifikimet përkatëse për zbardhjen e rrethanave të zhdukjes.

Familjarët shprehen të shqetësuar për fatin e 34-vjeçarit dhe vijojnë kërkimet, teksa nuk përjashtojnë as mundësinë që ai të ketë rënë pre e një rrëmbimi.

Ata u bëjnë apel qytetarëve që mund ta kenë parë ose të disponojnë informacion mbi vendndodhjen e tij të kontaktojnë menjëherë familjen ose autoritetet.

Çdo informacion që mund të ndihmojë në gjetjen e Eglant Koçit mund të përcillet në numrin e telefonit: 068 506 1619.

Ndërkohë, familjarët shpresojnë që publikimi i rastit të ndihmojë në gjetjen sa më të shpejtë të 34-vjeçarit, për të cilin prej tre ditësh nuk ka asnjë gjurmë.