Ish-presidentja e Kosovës, Vjosa Osmani, ka votuar në kuadër të zgjedhjeve të parakohshme parlamentare, duke bërë thirrje për një proces të rregullt dhe demokratik.

Pas votimit, Osmani u shpreh se procesi zgjedhor duhet të zhvillohet në mënyrë të qetë dhe u bëri apel qytetarëve që të marrin pjesë masivisht në votime.

“Dua t’u uroj të gjithë qytetarëve një proces të rregullt, i cili i kontribuon demokracisë dhe krijimit të institucioneve sa më parë që të jetë e mundur, në mënyrë që Kosova të dalë nga kriza. Shpresoj që sa më shumë qytetarë ta shfrytëzojnë të drejtën e tyre demokratike”, deklaroi Osmani.

Ajo falënderoi gjithashtu institucionet përgjegjëse për angazhimin gjatë procesit zgjedhor dhe theksoi rëndësinë e një dite të qetë votimi.

“Njëkohësisht i falënderoj të gjitha institucionet që gjatë ditës do të jenë në terren për të kryer detyrat dhe përgjegjësitë e tyre. Shpresoj që sot të jetë dita e Kosovës, dita kur Kosova do të festojë dhe do të fitojë”, u shpreh ajo.

Osmani shtoi se është e bindur që pas rezultateve do të hapet rruga për formimin e institucioneve të reja dhe daljen e vendit nga kriza politike.