Kryeministri në detyrë i Kosovës, Albin Kurti, ka votuar në kuadër të zgjedhjeve të parakohshme parlamentare, duke bërë thirrje për pjesëmarrje sa më të lartë të qytetarëve në procesin zgjedhor.

Pas votimit, Kurti u shpreh se qytetarët duhet të informohen paraprakisht për qendrën e tyre të votimit dhe më pas të ushtrojnë të drejtën demokratike.

“U sugjeroj qytetarëve të kontrollojnë ku e kanë vend votimin dhe më pas të nisen në këtë ditë kaq të rëndësishme për Kosovën, qeverisjen në vazhdim dhe për mbarëvajtjen e republikës”, u shpreh ai.

Kurti theksoi se pjesëmarrja e lartë në zgjedhje ndikon drejtpërdrejt në legjitimitetin e institucioneve.

“Sa më e lartë të jetë pjesëmarrja në zgjedhje aq më i madh është legjitimiteti i institucioneve dhe më solid stabiliteti i tyre. Sot vendosin ata që votojnë dhe prandaj u bëj thirrje qytetarëve të Kosovës të ushtrojnë të drejtën e tyre demokratike”, deklaroi Kurti pas votimit.