Një plagosje me armë zjarri është raportuar pak minuta më parë në qytetin e Vlorës, pranë rrethrrotullimit të Çoles, në lagjen “24 Maji”.

Sipas informacioneve paraprake, një person rreth 30 vjeç dyshohet se është qëlluar me armë në këmbë, menjëherë pasi kishte dalë nga një lokal në zonë.

I plagosuri është transportuar me urgjencë drejt Spitalit Rajonal të Vlorës, ku po merr ndihmën e nevojshme mjekësore.

Burime paraprake bëjnë me dije se autori i dyshuar është larguar nga vendngjarja me motor menjëherë pas të shtënave, ndërsa forca të shumta policie kanë rrethuar zonën dhe kanë nisur kërkimet për identifikimin dhe kapjen e tij.

Grupi hetimor po punon për zbardhjen e plotë të rrethanave të ngjarjes, identifikimin e autorit dhe përcaktimin e motivit që çoi në plagosjen e të riut.