Ngjarja e rëndë e zbuluar në Fushë-Mamurras, ku një 57-vjeçare dyshohet se ka vrarë me thikë nënën e saj 85-vjeçare dhe më pas është tentuar të paraqitet si vdekje natyrale, ka sjellë reagimin e familjarëve të viktimës, të cilët kundërshtojnë versionin paraprak të autoriteteve.

Menjëherë pas publikimit të lajmit, në redaksi ka mbërritur një mesazh nga familjarë të së ndjerës, të cilët kërkojnë hetim të plotë dhe shprehin dyshime mbi rrethanat e ngjarjes.

Sipas tyre, Violeta Shpani vuante prej vitesh nga probleme të shëndetit mendor, por ata nuk besojnë se ajo ka qenë në gjendje të organizojë dhe kryejë e vetme një krim të tillë, si dhe të fshihte më pas gjurmët e tij.

Familjarët pretendojnë se pranë banesës jetonte edhe djali i viktimës me bashkëshorten e tij dhe se marrëdhëniet mes tyre nuk kanë qenë të mira. Ata ngrenë gjithashtu akuza për episode të mëparshme dhune brenda familjes, duke kërkuar që hetimet të mos kufizohen në një pistë të vetme.

Një tjetër pikë që ata e konsiderojnë të rëndësishme lidhet me procedurat mortore. Sipas tyre, përgatitja e trupit për varrim sipas traditave të zonës kërkon kohë dhe ndihmën e disa personave, çka sipas tyre ngre pikëpyetje për mënyrën se si janë zhvilluar ngjarjet.

Familjarët deklarojnë se janë njoftuar për vdekjen rreth orës 14:00, ndërsa dyshohet se ngjarja mund të ketë ndodhur në orët e para të mëngjesit, duke shtuar më tej paqartësitë mbi kohën dhe rrethanat.

Në përfundim, ata i bëjnë thirrje organeve hetimore të zbardhin plotësisht të vërtetën dhe të identifikojnë çdo person që mund të ketë pasur rol në këtë ngjarje, duke kërkuar që çështja të mos mbyllet pa sqaruar çdo dyshim që e shoqëron rastin.