Lezhë – Policia e Lezhës ka finalizuar operacionin e koduar “Llogaritë”, duke vënë në pranga një 21-vjeçar dhe duke shpallur në kërkim bashkëpunëtorin e tij, të dyshuar për një seri vjedhjesh në qytet gjatë muajve maj dhe qershor të këtij viti.

Sipas njoftimit zyrtar, “si rezultat i veprimeve hetimore të kryera menjëherë pas kallëzimeve të disa shtetasve, gjatë muajve maj dhe qershor 2026, iu kishin vjedhur xhirot ditore në subjektet që administronin në qytetin e Lezhës, shërbimet e Komisariatit të Policisë Lezhë finalizuan operacionin e koduar ‘Llogaritë’”.

Në kuadër të këtij operacioni, u arrestua shtetasi M. M., 21 vjeç, banues në Lezhë, ndërsa është shpallur në kërkim bashkëpunëtori i tij, shtetasi E. U., 26 vjeç.

Policia bën me dije se hetimet vijojnë për dokumentimin e plotë të aktivitetit të dy të rinjve dhe për kapjen e personit të shpallur në kërkim.