Djali i ish-zv.drejtorit të Policisë së Tiranës përballet me SPAK, akuzohet për trafik droge dhe pastrim paras

Është ekstraduar gjatë ditës së sotme nga Spanja drejt Shqipërisë, Eralbi Breçani, djali i ish-zv.drejtorit të Policisë së Tiranës, Erzen Breçani.

Ai ishte shpallur në kërkim ndërkombëtar nga Gjykata e Posaçme (GJKKO) me kërkesë të SPAK, pas zbërthimit të bisedave në aplikacionet e koduara.

Sipas dosjes hetimore, Breçani akuzohet për veprat penale të “Trafikimit të narkotikëve”, të kryer në bashkëpunim në formën e “Grupit të strukturuar kriminal”, si dhe për “Pastrimin e produkteve të veprës penale”.

SPAK dyshon se ai është i përfshirë në trafikun ndërkombëtar të kokainës nga Amerika Latine drejt porteve kryesore të Europës.

Në materialet hetimore përmenden edhe komunikime të zbërthyera nga aplikacioni i koduar “Sky”, të cilat sipas prokurorisë kanë “fundosur” 11 persona, mes tyre edhe Eralbi Breçanin.

Në dosje thuhet se ai ka nisur aktivitetin e trafikimit dhe dyshohet se në të paktën dy raste ka vepruar në bashkëpunim me persona të tjerë.

Po ashtu, në komunikimet e përfshira në dosje përmenden edhe grupe bisede ku figuron Ervin Mata, kunati i tij, me dyshime për veprimtari të paligjshme.

Sipas SPAK, këto dyshime mbështeten edhe në mesazhe ku përmendet një ngarkesë prej 240 kg kokainë në Frankfurt, ku termi “rënë” i referohet sekuestrimit të lëndës narkotike nga autoritetet gjermane.