Prokuroria e Posaçme Kundër Korrupsionit dhe Krimit të Organizuar (SPAK) ka zbardhur detaje nga operacioni i zhvilluar sot kundër trafikut ndërkombëtar të drogës dhe pastrimit të parave, ku janë arrestuar edhe disa biznesmenë dhe janë vendosur masa të shumta sigurie ndaj personave të dyshuar.
Sipas njoftimit zyrtar, hetimi i nisur që në vitin 2021 ka dokumentuar aktivitetin e një grupi të strukturuar kriminal, i cili dyshohet se ka trafikuar kokainë nga Amerika Latine drejt Europës, ndërsa fitimet janë investuar më pas në pasuri të paluajtshme, projekte ndërtimi, kompani tregtare dhe biznese turistike në Shqipëri.
SPAK bën me dije se Gjykata e Posaçme ka caktuar masën “Arrest në burg” për 15 persona dhe “Arrest në shtëpi” për 5 të tjerë, ndërsa disa prej masave tashmë janë ekzekutuar. Një nga personat e shpallur në kërkim është arrestuar nga autoritetet greke.
Sipas hetimeve, personat A.H. dhe L.K. dyshohet se kanë pasur rol drejtues në organizimin e trafikut ndërkombëtar të kokainës nga Amerika Latine drejt porteve të Belgjikës, Holandës dhe Spanjës, duke përdorur një rrjet të strukturuar për furnizim, transport, magazinim dhe shpërndarje të lëndës narkotike në disa shtete europiane.
Një nga episodet kryesore të dosjes lidhet me sekuestrimin e 441 kilogramëve kokainë në Barcelonë, ndërsa janë dokumentuar raste të tjera sekuestrimesh në Holandë, Itali dhe Mbretërinë e Bashkuar.
Hetimet janë mbështetur edhe në komunikime të zbërthyera nga platforma e koduar SKY ECC, përgjime telefonike dhe bashkëpunim ndërkombëtar me autoritetet ligjzbatuese.
Përveç trafikut të drogës, SPAK thotë se është zbuluar edhe një skemë e gjerë e pastrimit të parave, ku të ardhurat kriminale janë investuar në pasuri të paluajtshme dhe biznese në Shqipëri dhe rajon.
Sipas vendimit të Gjykatës së Posaçme, është vendosur sekuestrim preventiv mbi pasuri me vlerë mbi 128.4 milionë euro, përfshirë:
* 2 vila në Green Coast (Palasë)
* 2 vila në Rolling Hills (Tiranë)
* 7 vila dhe 2 apartamente në Jalë
* Vila në Gjilekë dhe Himarë
* Një hotel në Lungomare (Vlorë)
* Mbi 113 mijë m² truall në Gjilekë
* Apartamente dhe prona në Tiranë, Sarandë dhe Shijak
* 38 apartamente në një projekt në Tiranë dhe 23 në një tjetër
* 106 garazhe
* Kompani tregtare në Shqipëri dhe Kosovë
* 336 llogari bankare të bllokuara
* Mbi 6.2 milionë euro dhe rreth 9 milionë lekë të sekuestruara
* Automjete luksoze si Lamborghini, Mercedes G-Class, Audi S8, si dhe mjete lundruese
Lista e personave të përfshirë në hetim përfshin një numër të madh shtetasish, mes tyre biznesmenë dhe persona të njohur, ndërsa SPAK vijon hetimet për identifikimin e plotë të rrjetit dhe pasurive të lidhura me aktivitetin kriminal.
Të përfshirë: Artur Shehu, Ilir Shtufi, Orest Sota, Orgert Bircaj, Edmond Jaupi, Artur Koceku, Abedin Koceku, Erion Rama, Adi Rama, Dritan Aga , Baftri Troci, Gëzim Islami, Ardian Zykaj, Alfredo Hamzai, Adrian Rama, Erjon Rama, Orgest Bircaj, Orest Sota, Elton Memeti, Artur Shehu, Leonard Bishaj, Arben Ismaili, Edmond Jaupi, Besnik Myftari, Dritan Aga, Luciano Koceku alias Artur Koceku, Dino alias Abedin Koceku, Ervin Koceku, Astrit Vladi, Kastriot Vladi, Gezim Islami, Ilir Shtufi.
Hetimet për këtë dosje konsiderohen ende në zhvillim dhe priten zhvillime të mëtejshme nga autoritetet.
