Irani po shqyrton mundësinë që memorandumi i mirëkuptimit (MoU) me Shtetet e Bashkuara të nënshkruhet drejtpërdrejt nga presidentët e të dy vendeve, gjatë takimit të planifikuar për në fund të kësaj jave në Zvicër.

Lajmi është bërë i ditur nga zëdhënësi i Ministrisë së Jashtme iraniane, Esmail Baghaei, i cili deklaroi se kjo mbetet një nga opsionet që po merret në konsideratë nga palët.

“Deri më tani, planet tona për takimin, të planifikuar për të premten në Zvicër, nuk kanë ndryshuar dhe sa i përket nënshkrimit të MoU, një nga idetë është që presidentët e të dy vendeve ta bëjnë atë, gjë që po shqyrtohet”, tha Baghaei.

Sipas deklaratës së tij, takimi mes presidentit amerikan Donald Trump dhe presidentit iranian Massoud Pezeshkian pritet të zhvillohet sipas planit, ndërsa negociatorët vijojnë diskutimet për formatin përfundimtar të marrëveshjes.

Më herët, autoritetet iraniane kishin bërë të ditur se dokumenti do të firmosej nga kryenegociatori iranian dhe kryetari i Parlamentit, Mohammad Bagher Ghalibaf, së bashku me zëvendëspresidentin amerikan J.D. Vance.

Megjithatë, deklarata e fundit e Teheranit sugjeron një ngritje të nivelit politik të marrëveshjes, duke hapur mundësinë që firmat të vendosen nga vetë krerët e shteteve, në një zhvillim që do të shënonte një moment të rëndësishëm në marrëdhëniet mes dy vendeve.