Një situatë e tensionuar është regjistruar jashtë ambienteve të Gjykatës së Posaçme të Apelit, menjëherë pas vendimit për të lënë në qeli ish-Presidentin e Republikës, Ilir Meta.

Përfaqësuesi ligjor i tij, avokati Kujtim Cakrani, ka reaguar me tone të ashpra përpara mediave, duke vënë në shënjestër gjyqtaren Saida Dollani, e cila sipas tij ka refuzuar për herë të tretë shqyrtimin e kërkesës për zëvendësimin e masës së sigurisë.

Sipas mbrojtjes, kërkesa është refuzuar për shkaqe formale, gjë që është cilësuar si shkelje e vendimeve të mëparshme të Gjykatës së Lartë, e cila kishte kërkuar shqyrtim të çështjes në themel.

Në deklaratën e tij për mediat, Cakrani nuk ka kursyer akuzat e forta ndaj gjyqtares.

“O nga frika për të liruar ish-presidentin, o nga paaftësia profesionale dhe mungesa e stabilitetit mendor”, është shprehur ai, duke kërkuar gjithashtu ndërhyrjen e Këshillit të Lartë Gjyqësor (KLGJ) për shqyrtimin e rastit.

Avokati ka kërkuar madje masa ekstreme, duke përmendur edhe mundësinë e shkarkimit të gjyqtares ose dërgimin e saj për vlerësim mjekësor, duke e konsideruar procesin si një “tallje” me sistemin e drejtësisë dhe avokatët.

Ndërkohë, mbrojtja ka bërë të ditur se nuk do të kërkojë përjashtimin e trupës gjykuese, duke argumentuar se kërkesa të tilla në të kaluarën janë refuzuar dhe kanë sjellë penalizime për avokatët.