Jonaid Myzyri është emëruar drejtues i Operatorit të Blerjeve të Përqendruara (OBP), duke zëvendësuar Arlinda Pogajn, e cila më herët dha dorëheqjen nga detyra.

Emërimi i Myzyrit vjen menjëherë pas largimit të Pogajt, duke sjellë një ndryshim në krye të një prej institucioneve kyçe të prokurimeve publike në vend.

Myzyri ka shërbyer më herët si ish-kreu i Komisionit të Prokurimit Publik (KPP). Ai ka qenë gjithashtu nën hetim nga SPAK lidhur me procedurat e tenderave gjatë periudhës 2020–2023.

Sipas dyshimeve hetimore të raportuara, procedurat e prokurimit në këtë periudhë janë zhvilluar në disa raste pa garë reale, ku shpesh ka marrë pjesë vetëm një kompani, ndërsa në raste të tjera kompani të ndryshme dyshohet se janë skualifikuar në mënyrë të padrejtë.

Hetimet ndaj Myzyrit lidhen pikërisht me mënyrën e zhvillimit të këtyre tenderave dhe respektimin e rregullave të konkurrencës në prokurimet publike.

Emërimi i tij në krye të OBP-së vjen në një moment kur sistemi i prokurimeve publike është në fokus të institucioneve dhe opinionit publik për transparencën dhe mënyrën e zhvillimit të procedurave.