Një grua 31-vjeçare ka humbur jetën në shtetin e Floridës, SHBA, pasi u sulmua nga një aligator teksa po notonte në lumin Econlockhatchee, në zonën e Pyllit Shtetëror Little Big Econ.

Viktima, Brittany Clark, ndodhej së bashku me partnerin e saj, Chance Allison, për një shëtitje në natyrë. Sipas autoriteteve, çifti kishte hyrë në ujërat e cekëta për të notuar kur një aligator rreth 3.7 metra i gjatë doli papritur nga uji dhe e sulmoi 31-vjeçaren.

Zyrtarët e Komisionit për Ruajtjen e Peshqve dhe Jetës së Egër të Floridës bëjnë me dije se gruaja u kafshua rëndë në të dyja duart.

Partneri i saj u përpoq ta shpëtonte, duke luftuar me aligatorin dhe duke arritur t’i çlironte njërën dorë. Megjithatë, kafsha e sulmoi sërish, duke i shkaktuar plagë të rënda.

Në një telefonatë emergjence në numrin 911, dëshmitarët e përshkruan situatën si kritike, duke raportuar humbje të madhe gjaku dhe dëmtime serioze. Pavarësisht përpjekjeve për t’i ardhur në ndihmë, 31-vjeçarja nuk arriti t’u mbijetojë plagëve të marra.