Kryeministri Edi Rama ka publikuar në profilin e tij në Facebook një video nga protesta e qytetarëve, ku shihen protestuesit duke marshuar drejt Kryeministrisë, ndërsa në të njëjtën kohë disa të rinj vijojnë aktivitetet sportive në fushat pranë bulevardit “Dëshmorët e Kombit”.

Videon, kreu i qeverisë e ka shoqëruar me mesazhin: “Me këtë pamje europiane të Tiranës së lirive të barabarta e shijeve të ndryshme për kohën e lirë, ju uroj një ditë të paqtë.”

Protestat e qytetarëve vijojnë prej rreth një muaji. Fillimisht ato u nxitën nga kundërshtimet ndaj investimit të planifikuar prej rreth 4 miliardë dollarësh në Zvërnec, ndërsa më pas u shoqëruan me kërkesa për dorëheqjen e qeverisë dhe largimin e klasës politike që ka dominuar vendin gjatë 36 viteve të fundit.

Në videon e publikuar nga Rama, pjesëmarrja në protestë duket më e ulët krahasuar me ditët e para të mobilizimit.