Autoritetet meksikane kanë sekuestruar rreth 3 ton kokainë dhe kanë arrestuar katër persona gjatë një operacioni të zhvilluar në Oqeanin Paqësor, pranë shtetit Oaxaca.

Droga ishte e ndarë në 86 pako dhe u gjet në dy anije që u ndaluan nga marina meksikane.

Operacioni u zhvillua pas patrullimeve detare dhe ajrore në zonën jugore të Meksikës, ku forcat detare ndërhynë duke ndaluar dy mjetet lundruese. Gjatë kontrollit u gjet edhe rreth 1 mijë litra karburant në 20 bidona.

Sipas autoriteteve, aksioni vjen në një periudhë kur Meksika ka intensifikuar goditjet ndaj trafikut të drogës, pas presionit të rritur nga Shtetet e Bashkuara për luftën kundër karteleve të narkotikëve dhe rrugëve të kontrabandës.

Marina meksikane vlerëson se me këtë sekuestrim është parandaluar shpërndarja e drogës me një vlerë të llogaritur rreth 37 milionë dollarë në tregun ilegal.

Autoritetet thonë se operacioni ka goditur ndjeshëm strukturat financiare dhe logjistike të krimit të organizuar dhe konsiderohet një nga ndërhyrjet më të mëdha të kohëve të fundit në rajon.