Kryeministri Edi Rama udhëton sot drejt Ankarasë, ku do të marrë pjesë në Samitin e NATO-s që zhvillohet më 7 dhe 8 korrik.
Sipas mediave turke, Presidenti i Turqisë Recep Tayyip Erdoğan do të zhvillojë takime dypalëshe me 32 liderë shtetesh dhe qeverish pjesëmarrës në samit, mes tyre edhe me kryeministrin shqiptar Edi Rama.
Në kuadër të samitit, Erdoğan pritet të zhvillojë takime edhe me liderë të tjerë të rëndësishëm ndërkombëtarë, përfshirë Presidentin e SHBA-së Donald Trump, Presidentin francez Emmanuel Macron, kancelarin gjerman Friedrich Merz, kryeministrin britanik në largim Keir Starmer, kryeministren italiane Giorgia Meloni dhe kryeministrin kanadez Mark Carney.
Në axhendë janë parashikuar gjithashtu takime me Sekretarin e Përgjithshëm të NATO-s, Mark Rutte, Presidentin e Këshillit Evropian Antonio Costa, Presidentin finlandez Alexander Stubb, Presidentin sllovak Peter Pellegrini, kryeministrin bullgar Rumen Radev dhe kryeministrin malazez Milojko Spajiç.
Një nga takimet më të rëndësishme të samitit pritet të jetë ai kokë më kokë mes Erdoğan dhe Presidentit amerikan Donald Trump, i cili do të pasohet nga një konferencë e përbashkët për shtyp.
Mbrëmjen e 7 korrikut, Presidenti turk dhe bashkëshortja e tij, Emine Erdoğan, do të organizojnë një darkë zyrtare për liderët pjesëmarrës në samit.
Ndërsa më 8 korrik, krerët e shteteve dhe qeverive do të zhvillojnë seancën plenare të Samitit të NATO-s, pas fotos tradicionale familjare të liderëve.
