Vetëm pak javë pasi kishte përfunduar shkollën e mesme dhe po përgatitej të niste studimet për arkitekturë, 19-vjeçari shqiptar Gent Maksutaj u vra me armë zjarri në një rrugë të qytetit të Uppsalës, në Suedi.

Ngjarja ka tronditur opinionin publik në Suedi. Sipas autoriteteve, një i mitur nën moshën 18 vjeç është arrestuar si i dyshuar për vrasjen, ndërsa prokuroria nuk përjashton mundësinë që në krim të jenë përfshirë edhe persona të tjerë.

Sipas hetimeve paraprake, sulmi mban tiparet e një ekzekutimi. Autori dyshohet se iu afrua viktimës me biçikletë dhe e qëlloi me armë zjarri. Pasi 19-vjeçari ra në tokë, ai dyshohet se iu afrua sërish dhe e qëlloi nga afër, përpara se të largohej me tren drejt Stokholmit, ku më vonë u arrestua në një restorant.

Hetuesit po punojnë për të zbardhur motivin e krimit. Deri më tani, policia suedeze nuk ka konfirmuar nëse vrasja lidhet me konfliktet mes bandave kriminale, fenomen që ka përfshirë vendin në vitet e fundit.

Gent Maksutaj sapo kishte përfunduar arsimin e mesëm dhe kishte planifikuar të vazhdonte studimet për arkitekturë. Familjarët dhe miqtë e përshkruajnë si një djalë pa lidhje me botën e krimit, ndërsa rrethanat e plota të vrasjes mbeten ende nën hetim.