Një ngjarje e rëndë është regjistruar në Fier, ku tre vajza adoleshente dyshohet se kanë ushtruar dhunë ndaj një bashkëmoshatareje në një banesë.

Pamjet e filmuara nga njëra prej vajzave tregojnë të miturën teksa goditet me shuplaka dhe grushte, ndërsa vajza që regjistron skenën dëgjohet duke nxitur vazhdimin e dhunës.

Sipas pamjeve, situata ka përshkallëzuar më tej, ku e mitura tërhiqet zvarrë prej flokësh, ndërsa dy prej vajzave e kapin njëkohësisht dhe e godasin.

Deri më tani nuk janë bërë të ditura rrethanat që kanë çuar në këtë konflikt, ndërsa identiteti i të miturave të përfshira nuk është bërë publik.

Ngjarja është denoncuar në Policinë e Fierit, e cila ka nisur veprimet hetimore për identifikimin e personave të përfshirë dhe zbardhjen e plotë të rrethanave të rastit.

Rasti ka rikthyer vëmendjen te fenomeni i dhunës mes të miturve dhe nevoja për reagim institucional për parandalimin e episodeve të tilla.