Vanesa Sono dhe Adion kanë bashkuar forcat për një projekt të ri muzikor me titull “Amore”, duke i dhënë kështu start sezonit veror me një duet të ri.

Dy artistët ishin të ftuar në studion e emisionit “Lancio” në Top Albania Radio, ku folën për këngën e re, bashkëpunimin mes tyre dhe planet që kanë për të ardhmen.

Gjatë intervistës, ata ndanë edhe vlerësimet që kanë për njëri-tjetrin.

Çfarë vlerësoni më shumë tek njëri-tjetri?

Adion: “Vanesa është njeriu më i fortë që kam parë ndonjëherë. Më pëlqen mënyra si i bën gjërat.”

Vanesa: “Adi është personi që mund të ulet dhe të ta përfundojë gjithë këngën për 10 minuta.”

Të pyetur për frymëzimet e tyre, artistët përmendën dashurinë dhe marrëdhëniet që i rrethojnë.

Çfarë ju inspiron juve?

Adion: “Mua më inspiron Ola.”

Vanesa: “Ndërsa mua më inspiron kjo gjëja që Ola dhe Adi kanë, dashuria. Gjithmonë nga dashuria kam shumë inspirim.”

Duke folur për tregun muzikor shqiptar, Vanesa u shpreh se suksesi kërkon shumë punë dhe përkushtim.

“Normalisht ka vështirësitë e veta, varet dhe se çfarë zhanri fokusohesh. Duhet shumë punë, shumë mund, investim nga të gjitha anët. Por thjesht duhet që ta duash me të vërtetë shumë”, tha ajo.

Sa i përket projekteve të ardhshme, dyshja zbuluan se kanë përgatitur materiale të reja muzikore.

Vanesa bëri të ditur se së shpejti do të sjellë edhe balada, të cilat pritet të publikohen gjatë dimrit, ndërsa Adion zbuloi se ata kanë edhe dy këngë të tjera së bashku.