Ministrja e Ekonomisë dhe Inovacionit, Delina Ibrahimaj, mori pjesë në tryezën e diskutimit për programin kombëtar që synon përgatitjen e biznesit shqiptar për integrimin në tregun unik europian.

Në një reagim në rrjetet sociale, Ibrahimaj theksoi rëndësinë e përgatitjes së sipërmarrjeve për sfidat dhe mundësitë që sjell procesi i integrimit në Bashkimin Europian.

“Biznesi shqiptar duhet të përgatitet që sot për tregun unik europian”, u shpreh ministrja, duke shtuar se në takim u diskutua vizioni për një ekonomi më konkurruese dhe një sektor privat më të gatshëm për të përfituar nga anëtarësimi në BE.

Sipas Ibrahimajt, programi kombëtar do të synojë të informojë dhe mbështesë rreth 48 mijë ndërmarrje, të vlerësojë nivelin e përgatitjes së tyre dhe të krijojë instrumente financiare e teknike për t’i ndihmuar ato të përmbushin standardet europiane.

“Së bashku me partnerët tanë ndërkombëtarë dhe komunitetin e biznesit, po ndërtojmë një mekanizëm të qëndrueshëm që do t’i ndihmojë sipërmarrjet shqiptare të rrisin konkurrueshmërinë, të zgjerojnë eksportet dhe të jenë gati për tregun unik europian”, deklaroi Ibrahimaj.

Në tryezë morën pjesë edhe zv/ministri i Ekonomisë, Enkelejd Musabelliu, si dhe ministrja e Shtetit dhe Kryenegociatorja, Majlinda Dhuka.