Rreth 5,800 persona janë arrestuar dhe afro 300 milionë dollarë janë sekuestruar në një operacion ndërkombëtar kundër mashtrimeve me manipulim psikologjik, njoftoi sot Interpoli.

Operacioni i koduar “First Light 2026” u zhvillua nga janari deri në prill dhe përfshiu forcat policore të 97 vendeve të botës. Objektivi kryesor ishte goditja e skemave kriminale që shfrytëzojnë besimin e njerëzve për t’u marrë para ose për të siguruar të dhëna konfidenciale.

Sipas Interpolit, këto forma mashtrimi përfshijnë vjedhjen e emaileve profesionale, shantazhin seksual online, mashtrimet emocionale në internet, vjedhjen e identitetit dhe skemat e rreme të investimeve.

“Numri shumë i konsiderueshëm i viktimave të identifikuara (142,000) nënvizon shkallën në të cilën ky lloj mashtrimi është bërë një kërcënim i madh ndërkombëtar, duke prekur individë, biznese dhe qeveri”, deklaroi organizata ndërkombëtare e policisë kriminale.

Gjatë operacionit u zbuluan dhe u goditën disa rrjete kriminale ndërkombëtare. Në Eswatini, autoritetet arrestuan 82 persona dhe shkatërruan një grup që dyshohet se operonte lojëra të paligjshme fati online dhe pastronte para përmes mashtrimeve të sofistikuara me vjedhje identiteti.

Në një nga rastet e zbuluara, mashtruesit kishin krijuar një ambient që imitonte një stacion policie braziliane, me uniforma të rreme, për t’u paraqitur gjatë video-thirrjeve si pjesëtarë të policisë federale. Ata bindnin viktimat se ishin përfshirë në një situatë kriminale dhe i manipulonin për të transferuar fonde, të cilat më pas përvetësoheshin nga grupi.

Interpoli theksoi se operacioni tregon përmasat globale të kërcënimit që paraqesin mashtrimet moderne dhe nevojën për bashkëpunim të vazhdueshëm mes agjencive ligjzbatuese.