Tensionet mes Shteteve të Bashkuara dhe Iranit vijojnë të përshkallëzohen, pasi Komanda Qendrore e SHBA-së (CENTCOM) njoftoi për një valë të re sulmesh ndaj infrastrukturës ushtarake iraniane.

Sipas deklaratës së CENTCOM, operacionet e zhvilluara më 8 korrik kishin në shënjestër rreth 90 objektiva strategjikë, përfshirë sisteme të mbrojtjes ajrore, asete të mbikëqyrjes bregdetare, depo raketash dhe dronësh, kapacitete detare si dhe infrastrukturë logjistike ushtarake përgjatë vijës bregdetare të Iranit.

“Forcat e CENTCOM përfunduan një raund shtesë sulmesh kundër Iranit për të zvogëluar më tej aftësinë e tij për të sulmuar anijet tregtare dhe personelin detar civil në Ngushticën e Hormuzit”, thuhet në deklaratën e publikuar në platformën X.

Sulmet e fundit vijnë vetëm një ditë pas një tjetër operacioni ushtarak amerikan, gjatë të cilit, sipas autoriteteve amerikane, u goditën rreth 80 objektiva të tjera ushtarake iraniane.

Nga ana tjetër, Teherani ka reaguar duke kryer sulme ndaj bazave amerikane në rajon dhe ka paralajmëruar se lundrimi në Ngushticën e Hormuzit do të lejohet vetëm sipas asaj që e cilëson si “marrëveshje iraniane”.

Përshkallëzimi i situatës ka shtuar shqetësimet për sigurinë në Lindjen e Mesme dhe ka ndikuar në rritjen e çmimeve të naftës në tregjet ndërkombëtare.

Vendet e Gjirit kanë shprehur alarm për zhvillimet e fundit, ndërsa komuniteti ndërkombëtar po ndjek me shqetësim situatën, për shkak të rrezikut të një konflikti më të gjerë që mund të ndikojë në stabilitetin rajonal dhe ekonominë globale.