Dy apartamente dhe një garazh me vlerë totale rreth 420 mijë euro janë sekuestruar në Tiranë, pasi dyshohet se janë përfituar nga veprimtari kriminale në fushën e trafikimit të lëndëve narkotike.

Aksioni u zhvillua nga specialistët e Seksionit për Hetimin e Pastrimit të Parave dhe Aseteve Kriminale, në bashkëpunim me Prokurorinë e Tiranës, pas një hetimi pasuror të kryer ndaj një shtetasi 54-vjeçar.

Në zbatim të vendimit të Gjykatës, u bë sekuestrimi i dy apartamenteve dhe një garazhi, të cilat, sipas hetimeve, i atribuohen 54-vjeçarit dhe dyshohet se janë krijuar me të ardhura që burojnë nga trafikimi i lëndëve narkotike.

Policia bën me dije se hetimet do të vijojnë për identifikimin dhe sekuestrimin e pasurive të tjera që mund të kenë burim kriminal, si të 54-vjeçarit, ashtu edhe të personave të lidhur me të.