Spanja është finalistja e parë e Kupës së Botës 2026, pasi ka mposhtur Francën me rezultatin 2-0 në gjysmëfinalen e zhvilluar në Arlington, Texas.

Skuadra iberike siguroi kështu rikthimin në finalen e një Botërori pas 16 vitesh, duke përsëritur suksesin e edicionit të vitit 2010, kur triumfoi për herë të parë në historinë e saj.

Spanja e nisi ndeshjen me ritëm të lartë dhe dominoi që nga minutat e para. Në minutën e 22-të, Lamine Yamal u pengua brenda zonës pas një ndërhyrjeje të gabuar të Lucas Digne, duke bërë që arbitri të akordonte penallti.

Nga pika e bardhë, Mikel Oyarzabal u tregua i saktë dhe mposhti portierin Mike Maignan, duke kaluar Spanjën në avantazh 1-0.

Problemet për Francën u shtuan vetëm pak minuta më vonë, në minutën e 29-të, kur mbrojtësi William Saliba u detyrua të largohej nga fusha për shkak të një dëmtimi, duke u zëvendësuar nga Maxence Lacroix.

Në pjesën e dytë, Spanja gjeti edhe golin e sigurisë. Në minutën e 58-të, pas një kombinimi të bukur mes Pedro Porro dhe Dani Olmo, ishte Porro ai që dërgoi topin në rrjetë, duke shënuar golin e dytë me fanellën e kombëtares spanjolle në 23 paraqitje.

Franca tentoi të rikthehej në lojë, por nuk arriti të krijojë reagimin e nevojshëm deri në fund të takimit. Spanja menaxhoi me qetësi avantazhin dhe siguroi një fitore të merituar 2-0.

Me këtë sukses, “La Roja” rikthehet në finalen e Kupës së Botës për herë të parë që prej vitit 2010, ndërsa Franca, finaliste në dy edicionet e fundit, largohet nga turneu në fazën gjysmëfinale.