Bllokada e re detare ndaj Iranit ka nisur në orën 23:00 sipas kohës greke, në zbatim të paralajmërimeve të mëparshme të presidentit amerikan Donald Trump.

Komanda Qendrore e Shteteve të Bashkuara (CENTCOM) konfirmoi fillimin e operacionit përmes një deklarate zyrtare, duke bërë të ditur se forcat amerikane kanë rikthyer masat bllokuese ndaj anijeve që lëvizin drejt porteve dhe zonave bregdetare iraniane, si dhe atyre që largohen prej tyre.

Sipas njoftimit të CENTCOM, aktualisht më shumë se 20 anije luftarake të Marinës amerikane dhe qindra avionë ushtarakë janë të angazhuar në operacione në Lindjen e Mesme.

Në deklaratën e komandës amerikane thuhet:

“Forcat amerikane rifilluan sot, në orën 16:00 (ora lindore), bllokadën detare të anijeve që lëvizin për në portet dhe zonat bregdetare iraniane dhe nga ato. Aktualisht, më shumë se 20 anije luftarake të Marinës Amerikane dhe qindra avionë ushtarakë po operojnë në Lindjen e Mesme. Forcat amerikane mbeten në gatishmëri, ruajnë fuqinë e tyre të zjarrit dhe janë gati për veprim”.

Vendimi vjen në një periudhë tensionesh të larta mes Uashingtonit dhe Teheranit. Shtetet e Bashkuara kanë shtuar praninë ushtarake në rajon, ndërsa Irani ka paralajmëruar për pasoja ndaj interesave amerikane dhe aleatëve të saj.

Situata pritet të monitorohet me vëmendje ndërkombëtare, ndërsa çdo përshkallëzim i mëtejshëm mund të ndikojë edhe në sigurinë detare dhe tregjet energjetike.