Kryeministri në largim i Britanisë së Madhe, Kier Starmer, mbajti këtë të mërkurë paraqitjen e tij të fundit në seancën tradicionale “Pyetje drejtuar Kryeministrit” (PMQs) në Parlament, duke e cilësuar atë si fundin e rrugëtimit të tij politik.

Në fjalën e tij para deputetëve, Starmer u shpreh krenar për punën e bërë gjatë mandatit dhe falënderoi bashkëpunëtorët për mbështetjen.

“Jam krenar për gjithçka që kemi arritur”, deklaroi ai, ndërsa falënderoi stafin e tij, duke shtuar se ata ishin “të gatshëm të kalonin përmes zjarrit” për ta mbështetur.

Seanca, që zgjati rreth 50 minuta, u zhvillua në një atmosferë më të qetë se zakonisht. Në vend të përplasjeve politike, deputetë nga të gjitha krahët e Parlamentit ndanë mesazhe vlerësimi dhe kujtime nga bashkëpunimi me kryeministrin në largim.

Në momentin e largimit nga Dhoma e Komunave, Starmer u përcoll me duartrokitje në këmbë nga deputetët laburistë, por edhe nga një pjesë e opozitës. Në sallë ishte e pranishme edhe familja e tij, ndërsa ministrja e Financave, Rachel Reeves, u shfaq e emocionuar.

Deputetja laburiste Caroline Harris, me lot në sy, deklaroi se “çdo ditë shohim dinjitetin dhe guximin e tij të shkëlqejnë”.

Liderja e Partisë Konservatore, Kemi Badenoch, shmangu një përballje të fortë politike, duke vlerësuar qëndrimin e Starmerit ndaj Ukrainës dhe marrëdhënien e tij me presidentin Volodymyr Zelensky. Megjithatë, ajo kritikoi Partinë Laburiste dhe mungesën e pasardhësit të tij në seancë, duke e akuzuar se po shmang përballjen parlamentare.

Edhe lideri i Liberal Demokratëve, Ed Davey, e cilësoi Starmerin “një patriot të vërtetë”, duke theksuar bashkëpunimin e tij me deputetë të të gjitha forcave politike.

Në fund të fjalës së tij, Starmer iu drejtua të ftuarve në galeritë e Parlamentit, mes të cilëve ndodheshin persona që kishte njohur gjatë kohës në Downing Street.

“Për të gjithë ata që ndodhen në galeri dhe jeta e të cilëve ka ndryshuar ose është përmirësuar falë kësaj qeverie laburiste, por edhe për të gjithë ata në vend që përpiqen të dëgjohen apo të bëhen të dukshëm, ju jeni arsyeja pse hyra në politikë”, tha ai.

Kier Starmer pritet t’ia dorëzojë zyrtarisht detyrën Andy Burnham të hënën, pasi ish-kryebashkiaku i Mançesterit të Madh të konfirmohet si lideri i ri i Partisë Laburiste në konferencën e posaçme të partisë.

Edhe pse largohet nga drejtimi i qeverisë pas presioneve të brendshme në parti, vetëm dy vite pas fitores së madhe elektorale të laburistëve, Starmer u përcoll me duartrokitje të ngrohta nga grupi parlamentar i Partisë Laburiste.