Gjykata e Apelit ka lënë në fuqi vendimin për Mario Përlleshajn, i akuzuar për vrasjen e 14-vjeçarit Martin Cani në Tiranë.

Apeli ka konfirmuar dënimin me 16 vite burg të dhënë më herët nga Gjykata e Shkallës së Parë për ngjarjen e rëndë që tronditi opinionin publik.

Pas përfundimit të seancës gjyqësore, babai i Martin Canit ka reaguar për mediat, duke shprehur pakënaqësi për masën e dënimit, pasi familja kishte kërkuar një dënim më të lartë.

“Kjo që na ka ndodhur ne mos t’i ndodhë askujt. Dhimbja jonë është shumë e madhe. Ligjet janë ligje, por ne pretendonim një dënim më të madh. Dënimi është për 2 vepra penale. Një i ri mund të vrasë 50 persona sot me një bombë, dhe dënohet 12 vite burg”, u shpreh ai.

Babai i viktimës theksoi se sipas tyre në ngjarje kanë ekzistuar rrethana të tjera rënduese.

“Siç e dini dhe ju janë 2 rrethana cilësuese. Falë Zotit që nuk ka pasur fëmijë të tjerë aty. Sa i përket autorit, Luisi ishte i vdekur, ndërkohë që Martinin e vrau me thikë në zemër. Dhimbja jonë është shumë e madhe”, deklaroi ai.

Vendimi i Apelit konfirmon kështu dënimin e Përlleshajt me 16 vite burg, ndërsa familja e 14-vjeçarit vijon të kërkojë një masë më të ashpër ndëshkimi për autorin e ngjarjes.