Një 43-vjeçar është arrestuar nga Policia në fshatin Bërxullë, pasi gjatë kontrollit në banesën e tij u gjet një armë zjarri pistoletë e mbajtur pa leje, së bashku me një krehër me 7 fishekë.

I arrestuari është identifikuar si Juljan Koni, i cili akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”.

Sipas policisë, arma dhe municioni janë sekuestruar në cilësinë e provës materiale.

Kontrolli në banesën e 43-vjeçarit është kryer në kuadër të veprimeve të ndërmarra nga autoritetet pas vrasjes së 50-vjeçarit Edmond (Ali) Sula, ngjarje e ndodhur në Bërxullë.

Deri në këto momente, autoritetet nuk kanë bërë asnjë lidhje mes armës së gjetur në banesën e Konit dhe vrasjes së Edmond Sulës, ndërsa hetimet për zbardhjen e kësaj ngjarjeje të rëndë vijojnë.

Policia bën me dije se arrestimi u krye në kuadër të operacionit të koduar “Risku”, pas kontrolleve, hetimeve dhe informacioneve operative për goditjen e rasteve të armëmbajtjes pa leje dhe identifikimin e personave që mund të jenë të përfshirë në veprimtari kriminale.