Refit Buzi, autori i dyshuar i ngjarjes së rëndë në Fier, ka liruar ish-të fejuarën e tij, Rozalinda Plaka, të cilën dyshohet se e mbante me forcë pas vrasjes së ish-vjehrrit dhe plagosjes së ish-vjehrrës.

Pas disa orësh negociatash me forcat speciale RENEA, 35-vjeçari ka pranuar të lirojë gruan, ndërsa efektivët vijojnë përpjekjet për ta bindur që të dorëzohet.

Buzi dyshohet se mëngjesin e sotëm ka vrarë me armë gjahu ish-vjehrrin e tij, Kosta Plaka, ka plagosur ish-vjehrrën Belere Plaka dhe më pas është larguar nga vendngjarja me automjet, duke marrë me vete ish-të fejuarën.

Pas ngjarjes, policia ka rrethuar zonën ku dyshohet se ndodhet autori, ndërsa negociatorët po vijojnë komunikimin me të për të shmangur çdo përshkallëzim të situatës.

Hetimet vijojnë për zbardhjen e plotë të dinamikës së ngjarjes dhe motiveve që çuan në këtë krim të rëndë.