Një konflikt mes dy kushërinjve ka përfunduar me plagosje me thikë në Lushnjë, ndërsa Policia ka vënë në pranga autorin e dyshuar, 60-vjeçarin Izet Ymeri, i njohur në rrjetin social TikTok me nofkën “Izet Pantera”.

Sipas policisë, ngjarja ndodhi mbrëmjen e djeshme në lagjen “Loni Dhamo”, ku pas një konflikti për motive të dobëta, Izet Ymeri dyshohet se goditi me thikë kushëririn e tij, 70-vjeçarin Faslli Ymeri.

I plagosuri u transportua fillimisht në Spitalin e Lushnjës dhe më pas në Spitalin e Traumës në Tiranë për trajtim më të specializuar. Burime policore bëjnë me dije se 70-vjeçari ndodhet jashtë rrezikut për jetën.

Menjëherë pas ngjarjes, shërbimet e Policisë arrestuan 60-vjeçarin, i cili pritet të përballet me akuzën për veprën penale “Plagosje e rëndë me dashje”, ndërsa hetimet vijojnë për zbardhjen e plotë të rrethanave të konfliktit.

Izet Ymeri është një personazh i njohur në TikTok, ku është bërë i famshëm me nofkën “Izet Pantera”. Ai tërhoqi vëmendjen e publikut për videot dhe transmetimet “live” që realizonte së bashku me reperin Kleviol Ahmeti, i njohur si Clevio, me të cilin shfaqej shpesh në sfida dhe biseda që ndiqeshin nga një numër i madh përdoruesish në rrjetet sociale.