Policia e Berlinit ka identifikuar autorin e dyshuar të sulmit me furgon gjatë Paradës së Krenarisë LGBTQ+, ku humbi jetën një person dhe mbetën të plagosur të paktën 16 të tjerë.

Sipas autoriteteve, personi i dyshuar është 21-vjeçari Abdul B., i cili vijon të jetë në arrati. Policia bëri të ditur se ai nuk është arrestuar ende, por është i njohur për organet ligjzbatuese dhe dyshohet se ka lidhje me qarqe ekstremiste islamike në kryeqytetin gjerman.

“I dyshuari është i njohur për policinë. Ai njihet nga ne si anëtar i qarqeve islamike këtu në Berlin dhe kërkimi për të vazhdon me intensitet të plotë”, deklaroi zëdhënësi i Policisë së Berlinit, Florian Nath.

Sipas hetimeve paraprake, rreth orës 22:00, një furgon hyri në parkun Tiergarten, ku përplasi disa persona përpara se të përfundonte i përplasur me një pemë.

Hetuesit vijojnë marrjen në pyetje të dëshmitarëve dhe po verifikojnë gjithashtu raportimet sipas të cilave disa prej të plagosurve mund të kenë marrë edhe plagë me thikë. Megjithatë, autoritetet theksojnë se është ende herët për të nxjerrë përfundime mbi dinamikën e plotë të ngjarjes.

Ndërkohë, operacioni për kapjen e autorit të dyshuar vijon, ndërsa policia u ka bërë thirrje qytetarëve të dorëzojnë çdo foto ose video që mund të ndihmojë në zbardhjen e plotë të sulmit.