Evropa po përballet me një nga sezonet më të vështira të zjarreve në vitet e fundit, ndërsa temperaturat ekstreme dhe thatësira kanë krijuar kushte të favorshme për përhapjen e shpejtë të flakëve në shumë vende të kontinentit.

Sipas ekspertëve, moti i nxehtë ka tharë ndjeshëm bimësinë, duke e kthyer atë në një “kuti baruti”, ku edhe një shkëndijë e vogël mund të shkaktojë zjarre të përmasave të mëdha.

Situata është përkeqësuar edhe nga dimri i lagësht, i cili favorizoi rritjen e bimësisë së re dhe shtoi sasinë e materialit të thatë që mund të digjet gjatë muajve të verës.

Të dhënat e Sistemit Evropian të Informacionit për Zjarret në Pyje (EFFIS) tregojnë se gjatë këtij viti është djegur një sipërfaqe më e madhe se mesatarja e regjistruar në të njëjtën periudhë të viteve të kaluara.

Megjithatë, deri më 22 korrik, sipërfaqja totale e djegur në nivel kontinental mbetet pak më e ulët krahasuar me vitin 2025, i cili konsiderohet si viti më i rëndë i regjistruar ndonjëherë për zjarret në Evropë.

Situata më shqetësuese paraqitet në Francë, ku që nga fillimi i vitit janë regjistruar më shumë se 300 zjarre, mbi trefishi i mesatares vjetore prej 93 zjarresh.

Ekspertët e lidhin përkeqësimin e situatës me ndryshimet klimatike, të cilat po sjellin temperatura më të larta dhe periudha më të gjata pa reshje.

Këto kushte kanë ulur ndjeshëm lagështinë në tokë dhe në bimësi, duke rritur rrezikun që zjarret të përhapen me shpejtësi dhe të bëhen më të vështira për t’u kontrolluar.

Sipas shërbimit meteorologjik francez Météo-France, lagështia e tokës në Francë ka arritur nivelin më të ulët të regjistruar ndonjëherë për këtë periudhë të vitit, duke e bërë sezonin aktual të zjarreve veçanërisht të rrezikshëm.

Autoritetet evropiane vijojnë monitorimin e situatës, ndërsa ekipet e emergjencës në disa vende janë në gatishmëri të lartë për përballimin e vatrave të reja të zjarrit.I