Një ngjarje e rëndë është shënuar këtë të mërkurë në Mitrovicë, ku disa punonjës të Kompanisë Rajonale të Ujësjellësit “Mitrovica” janë qëlluar me armë zjarri gjatë kohës që po kryenin një inspektim për lidhje ilegale.

Sipas raportimeve të mediave në Kosovë, fatmirësisht nga të shtënat nuk ka pasur persona të lënduar. Pas ngjarjes, autori ka arritur të largohet nga vendi i ngjarjes dhe është shpallur në kërkim nga autoritetet.

Policia e Kosovës ka bërë me dije se personi i dyshuar hetohet për disa vepra penale, përfshirë “Sulm ndaj personit zyrtar”, si dhe “Mbajtje të paautorizuar të armës dhe përdorim të armës”.

Hetimet vijojnë për identifikimin dhe kapjen e autorit, si dhe për zbardhjen e plotë të rrethanave të ngjarjes.