Një konflikt i dhunshëm është regjistruar pas mesnate në qytetin e Tepelenës, ku tre persona kanë mbetur të plagosur pas goditjeve me sende të forta.

Sipas informacionit paraprak të Policisë, ngjarja ka ndodhur rreth orës 00:30, kur për motive të dobëta është konfliktuar një grup personash. Si pasojë e përplasjes kanë mbetur të dëmtuar shtetasit A. B., 39 vjeç, E. B., 41 vjeç, vëllezër, si dhe M. B., 46 vjeç, djali i xhaxhait të tyre. Të tre janë banues në Tepelenë.

Të plagosurit janë transportuar në spital, ku po marrin ndihmë mjekësore dhe ndodhen jashtë rrezikut për jetën.

Grupi hetimor po vijon punën për identifikimin e personave të tjerë të përfshirë në konflikt, dokumentimin e plotë të rrethanave të ngjarjes dhe vënien para përgjegjësisë penale të autorëve.

Policia bëri me dije se, pas përfundimit të veprimeve procedurale, do të japë një njoftim më të detajuar për këtë rast.