Një tërmet i fuqishëm ka tronditur mbrëmjen e së premtes zonën vullkanike të Campi Flegrei në jug të Italisë, duke shkaktuar panik në Napoli dhe qytetet përreth.

Lëkundja me magnitudë paraprake 4.7 u regjistrua rreth orës 19:46 dhe, sipas Institutit Kombëtar të Gjeofizikës dhe Vullkanologjisë (INGV), është më e forta e regjistruar ndonjëherë në këtë zonë të lidhur me fenomenin e bradisizmit.

Pas tërmetit kryesor, aktiviteti sizmik vijoi me të paktën nëntë pasgoditje, ndërsa një tjetër lëkundje e fortë u ndje rreth orës 22:00. Frika për një përshkallëzim të situatës bëri që mijëra banorë të dilnin nga banesat dhe të qëndronin në ambiente të hapura.

Dëmet më të mëdha janë raportuar në Pozzuoli, ku një mur mbrojtës pranë linjës hekurudhore Cumana u shemb mbi shina, duke detyruar pezullimin e qarkullimit në disa linja transporti. Për arsye sigurie u ndërprenë përkohësisht edhe linjat Cumana, Circumflegrea dhe metroja për kontrolle teknike.

Në disa zona janë evidentuar rrëshqitje shkëmbinjsh, ndërsa në nënkalimin Savino Vitagliano gurë dhe materiale shkëmbore ranë mbi automjete. Gjithashtu, në disa ndërtesa u raportuan dëmtime të suvave dhe elementëve të brendshëm, ndërsa disa banorë mbetën përkohësisht të bllokuar në apartamente për shkak të deformimit të dyerve.

Menjëherë pas lëkundjeve, autoritetet italiane aktivizuan strukturat e emergjencës. Prefektura ngriti Qendrën e Koordinimit të Emergjencave, ndërsa shërbimet e Mbrojtjes Civile nisën kontrollet në zonat e prekura.

Sipas INGV-së, tërmeti lidhet me fenomenin e bradisizmit, një proces natyror gjatë të cilit toka në zonën e Campi Flegrei ngrihet dhe ulet gradualisht për shkak të aktivitetit nëntokësor. Instituti theksoi se një lëkundje me magnitudë 4.7 nuk ishte regjistruar më parë në këtë fazë të aktivitetit, duke kaluar edhe tërmetet me magnitudë 4.6 të regjistruara gjatë vitit 2025.

Lëkundjet u ndjenë në shumë lagje të Napolit, përfshirë Vomero, Chiaia, Fuorigrotta, Soccavo dhe Colli Aminei. Në disa zona pati ndërprerje të energjisë elektrike dhe probleme të përkohshme me rrjetin telefonik.

Banorët përshkruan momente paniku, duke treguar se tërmeti ishte i gjatë dhe shumë i fortë, ndërsa shumë prej tyre zgjodhën të mos riktheheshin menjëherë në banesat e tyre nga frika e pasgoditjeve.

Ndërkohë, ekipet teknike vijojnë kontrollet në infrastrukturën e qytetit. Një dëmtim i pjesshëm është raportuar edhe në një shtyllë të tensionit të lartë në zonën e Agnanos, ndërsa furnizimi me energji elektrike është rikthyer pjesërisht në shumicën e zonave të prekura.