Një aksident tragjik rrugor në ishullin e Kretës, në Greqi, i ka marrë jetën dy shtetasve shqiptarë.

Ngjarja ndodhi në aksin rrugor Kissamos–Hania, pranë zonës së Kolimbarit, ku dy të rinjtë po udhëtonin me një motoçikletë. Sipas informacioneve paraprake, në rrethana që ende po hetohen, drejtuesi humbi kontrollin e mjetit dhe motoçikleta u përplas me barrierat anësore të rrugës.

Përplasja rezultoi fatale, ndërsa të dy shqiptarët humbën jetën në vendngjarje.

Viktimat janë identifikuar si Edison Xhaka, 28 vjeç, nga Elbasani, i cili prej vitesh jetonte dhe punonte në Kissamos, si dhe Aleksandër Toçila, 34 vjeç, nga Gramshi, i cili gjithashtu jetonte dhe punonte në të njëjtën zonë.

Familjarët, miqtë dhe bashkëqytetarët i kanë përshkruar dy viktimat si djem punëtorë dhe të respektuar, të cilët kishin ndërtuar jetën e tyre në Greqi dhe kishin plane për të ardhmen, të ndërprera tragjikisht nga aksidenti.

Autoritetet greke kanë nisur hetimet për të zbardhur shkaqet dhe rrethanat e plota të aksidentit.