Dy persona me precedentë të mëparshëm penalë për vjedhje janë arrestuar në flagrancë nga Policia e Vlorës, pasi dyshohet se kanë shkelur masën e sigurisë “Arrest në shtëpi” dhe kanë udhëtuar nga Tirana drejt Vlorës për të kryer vjedhje në banesa.

Operacioni policor i koduar “Again” ka çuar në goditjen e veprimtarisë së dyshuar kriminale në fushën e vjedhjeve, ndërsa gjatë ndërhyrjes janë sekuestruar pajisje të posaçme për hapjen e bravave dhe kasafortave, një automjet dhe dy celularë.

Sipas Policisë së Vlorës, të arrestuarit janë shtetasit A. G., 48 vjeç dhe A. H., 46 vjeç, banues në Tiranë, të dy me precedentë të theksuar penalë për vjedhje.

Dy personat janë kapur në flagrancë në lagjen “Bashkimi” të Vlorës, në momentin që, duke përdorur pajisje të posaçme, po tentonin të hapnin derën e një banese me qëllim grabitjen.

Nga verifikimet e kryera nga autoritetet rezultoi se të dy kishin thyer masën e sigurisë “Arrest në shtëpi”, e cila u ishte caktuar për të njëjtën vepër penale, dhe ishin larguar nga Tirana për të vijuar aktivitetin e dyshuar kriminal në Vlorë.

Në cilësinë e provës materiale u sekuestruan pajisje për hapjen e bravave dhe kasafortave, automjeti tip “Mercedes-Benz” që dyshohet se përdorej nga autorët, si dhe dy telefona celularë.

Materialet procedurale i janë referuar Prokurorisë për veprat penale “Vjedhja”, mbetur në tentativë, dhe “Largimi i të burgosurit nga vendi i qëndrimit”.